Qendra Kinematografike e Kosovës (QKK), institucioni kryesor publik për financimin e filmit dhe autoriteti qendror për kinematografinë në Kosovë, fton të gjithë të interesuarit të dërgojnë propozime për përfaqësimin e Kosovës në kategorinë “Filmi Ndërkombëtar Artistik” të Akademisë së Arteve dhe Shkencave të Filmit (AMPAS), për edicionin e 98-të.
Kriteret e Përfshirjes
Në këtë kategori përfshihen filmat e metrazhit të gjatë artistik, dokumentarë dhe të animuar më të gjatë se 40 minuta, që janë shfaqur/do të shfaqen në kinema apo platformë VOD, për më së paku 7 ditë radhazi, jo më herët se 1 tetor 2024 dhe jo më vonë se 30 shtator 2025.
Gjatë periudhës kualifikuese dhe gjatë shfaqjes në kinema, filmi duhet të reklamohet dhe shpërndahet në mënyrë të zakonshme për një premierë në kinema (theatrical release). Filmat që realizojnë shfaqje publike jashtë kinemave para shfaqjes kualifikuese nuk do të merren në konsideratë. Shfaqje të tilla përfshijnë (por nuk kufizohen në): transmetimin televiziv ose kabllor, PPV/VOD, shpërndarjen në DVD, shfaqjen gjatë fluturimeve ajrore, transmetimet online etj.
Shkarko rregulloren e plotë të Akademisë për kategorinë “Filmi Ndërkombëtar Artistik” – Edicioni i 98-të
Afati i fundit për aplikim: 21 korrik 2025, ora 16:00
Email: [email protected]
Adresa postare:
Qendra Kinematografike e Kosovës
Rruga UÇK Nr. 273
10000 Prishtinë, Kosova
Procesi i Formimit dhe Funksionimit të Komitetit të Përzgjedhjes
Qendra Kinematografike e Kosovës është institucioni përgjegjës për formimin e Komitetit të Përzgjedhjes për kategorinë “Filmi Ndërkombëtar Artistik” të Akademisë së Arteve dhe Shkencave të Filmit. Kjo bëhet përmes një procesi të rregullt dhe transparent që garanton pavarësinë dhe profesionalizmin e përzgjedhjes.
Metoda e gjetjes së filmave është thirrja e hapur. QKK shpall publikisht ftesën për aplikime përmes faqes zyrtare të internetit dhe kanaleve zyrtare të mediave sociale, duke ftuar të gjithë krijuesit e filmave që plotësojnë kriteret të dorëzojnë veprat e tyre për shqyrtim. Nuk ka tarifë aplikimi.
Komiteti përbëhet nga pesë anëtarë të respektuar e aktivë në industrinë e filmit në Kosovë. Përbërja ndryshon pothuajse çdo vit dhe anëtarët emërohen vetëm pasi të ketë përfunduar afati për dorëzimin e filmave, në mënyrë që të shmangen konfliktet e interesit. Askush që është i përfshirë drejtpërdrejt ose përfaqëson interesat e ndonjë filmi të dorëzuar nuk mund të jetë pjesë e komitetit. Anëtarët emërohen nga QKK.
Kryetari i komitetit caktohet gjithashtu nga QKK, duke marrë parasysh se cili prej anëtarëve ka aftësinë më të mirë për të udhëhequr diskutimin në mënyrë efektive dhe të paanshme, bazuar në përvojën, aftësitë komunikuese dhe aftësinë për të udhëhequr një proces të drejtë e të strukturuar.
Të gjithë anëtarët e komitetit janë të detyruar të shikojnë të gjithë filmat e dorëzuar para mbledhjes zyrtare. Në mbledhje zhvillohet një diskutim i hapur ku secili anëtar ndan vërejtjet e tij. Procesi i vendimmarrjes bazohet në shumicën e votave: fillimisht vendoset nëse Kosova do të bëjë një aplikim atë vit; nëse po, dhe ka më shumë se një film të kualifikuar, anëtarët i rendisin filmat nga më i preferuari te më pak i preferuari. Përdoret një sistem pikësh: filmi i renditur i pari merr pikë të barabarta me numrin e filmave të dorëzuar, i dyti një pikë më pak, e kështu me radhë. Filmi me numrin më të lartë të pikëve shpallet përfaqësimi zyrtar i Kosovës.
Diskutimet e komitetit mbeten konfidenciale, por pas përzgjedhjes, QKK publikon emrin e filmit të zgjedhur dhe konfirmon se procesi është zhvilluar në përputhje me këto udhëzime.
Shënim: Kjo faqe nuk përdor markat tregtare të Akademisë (“OSCAR®”, “OSCARS®”, “ACADEMY AWARD®”, “ACADEMY AWARDS®”) në titull apo nën-titull dhe nuk shfaq imazhin e statujës së Oscar-it, në përputhje me rregulloret e Akademisë.
